Tá feachtas tacaíochta ar siúl faoi láthair ar son Katie O'Halloran, bean a rugadh gan lamha. Léigh tuilleadh.
Éigse an Spidéil www.eigseanspideil.ie
Baile beag Gaeltachta is ea an Spidéal agus tá sé lonnaithe timpeall dhá mhíle dhéag taobh thiar de Chathair na Gaillimhe, ar bhóthar an chósta. Féile pobail is ea Éigse an Spidéil. Bunaíodh í le gnéithe éagsúla de chultúr na háite, ar nós an damhsa, na hamhránaíochta, na filíochta agus na healaíona a cheiliúradh. I measc imeachtaí na hÉigse bíonn taispeántas idirnáisiúnta dhamhsa thraidisiúnta, ceolchoirm mhór, oícheanta filíochta agus seisiúin amhránaíochta agus ceoil.
Katie Born to Run
Tá feachtas curtha ar bun ag muintir Iorras Aithneach le cabhrú le Katie O'Halloran, bean a rugadh gan lamha ach a bhfuil éacht déanta aici lena cuid deacrachtaí a shárú agus atá ina mac léinn iarchéime in Ollscoil na hÉireann, Gaillimh faoi láthair. Ba chóir do chuile dhuine pé ar bith cén cabhair is féidir leo a thabhairt di.
Féach ar Katie Born to Run le haghaidh tuilleadh eolais.
Caitríona Ní Oibicín
Is údar bróin an-mhór do phobal Éigse an Spidéil bás Chaitríona Ní Oibicín inniu 21 Aibreán 2013.
Bean chumasach, chruthaitheach, ildánach í, a raibh an-teacht i láthair agus deis a labhartha aici. Bhí ar a cumas daoine a spreagadh agus mheall sí iad le comhoibriú agus le tacú léi. Bhí Caitríona ina riarthóir ar an nGaelacadamh agus ba cuid dá dualgas cúram a dhéanamh den Éigse. Rinne sí sin le fonn, fuinneamh agus fuadar! Thug sí faoina cuid cúraimí ar bhonn fíor-ghairmiúil agus is cinnte go raibh rath suntasach ar an Éigse chúns a bhí sí ag plé leis.
Threoraigh sí an coiste le forbairt a dhéanamh ar chlár na hÉigse agus le cur le raon agus le héagsúlacht na n-imeachtaí. Ise go háirithe a spreag an clár damhsa; cuireadh taispeántais idirnáisiúnta ón mBrásaíl go dtí an Ind ar ardán na hÉigse i gcomhluadar damhsóirí sean-nóis Chonamara. Tháinig borradh ar na taispeántais ealaíne le tacaíocht Chaitríona. Ise a thug múnla eile chun cinn do cheiliúradh Tom Phaidín Tom agus a chuimhnigh ar an mBonnán Buí mar ghradam cuimhneacháin. Thug sí an-tacaíocht go deo do Cheilúradh Céid Mháirtín Uí Chadhain in 2006 agus eagraíodh sár-dheireadh seachtaine sa Spidéal i mí Eanáir na bliana sin.
Aireoidh muid uainn Caitríona bhríomhar, ghealgháireach, uasal. Chothaigh sí deiseanna d'amhránaithe, do cheoltóirí, d'fhílí agus d'ealaíontóirí. Chuir sí leis an gcomhluadar cruthaitheach agus is saibhride saol an phobail ar fad de bharr a saothair.
Suaimhneas síorraí go raibh aici.
Siúlóid ar an tSráidbhaile 2013
Le linn siúlóid 2013, luaigh Timín Joe Tim Ó Curraidhín tuairisc faoi iarracht ar luíochán sa Spidéal i Mí Bealtaine 1921. Tá fáil ar an tuairisc sin ar láithreán an Bhureau of Military History. (Gabh chuig leathanach 31.)
Sruth
Tá áthas ar an nGaelacadamh a fhógairt go bhfuil dámhachtain €10,000 tairgthe ag an gComhairle Ealaíon do choimisiún ceoil Sruth. Is iad Mary Bergin agus Johnny Óg Connolly a bheidh ag cumadh na sraithe. Sraith ceoil le cúig nó sé ghluaiseacht a mhairfidh idir 25 agus 30 nóiméad atá ann. Beidh an chéad léiriú poiblí den sraith a dhéanamh mar chuid d'Éigse an Spidéil ar an 9ú Márta 2013 in Óstán na Páirce. Tá muid ag súil go múinfear an sraith freisin do pháistí atá ag freastal ar ranganna an Ghaelacadaimh amach anseo — páistí a bhfuil ard-léibhéal oilteachta acu — agus go mbeidh sé mar chuid de repertoire cheoltóirí Chonamara agus Éirinn amach anseo.
Chuir Deirdre Nic Chonaonaigh, riarthóir an Ghaelacadaimh, iarratas isteach ag An gComhairle Ealaíon don dámhachtain Coimisiún sna hEalaíona Traidisiúnta i Mí Bealtaine seo caite. Sé mórchuspóir An Ghaelacadaimh ná leas an chultúir agus an traidisiún Ghaelaigh a chothú agus a threisiú i gConamara. Reáchtáileann muid ranganna ceoil, amhránaíochta sean-nóis agus damhsa sean-nóis chun an aidhm seo a bhaint amach. Tá dea-chleachtas ealaíona agus gaol láidir le ceoltóirí agus leis an bpobal forbartha ag an eagrais thar na mblianta. Leagann muid béim mhór freisin ar cheiliúradh na n-ealaíona dúchasacha i measc an phobail trí ócáidí d'ard-chaighdeán ar nós Éigse an Spidéil agus Ardán a reachtáil.
I measc na múinteoirí a mbíonn An Gaelacadamh ag obair leo tá Mary Bergin, a bhfuil clú agus cáil bainte amach aici mar cheoltóir traidisiúnta ar an bhfeadóg stáin agus ar an bhfeadóg mhór. Bíonn sí ag casadh ceoil go neamhspleách agus mar bhall den grúpa Dordán. Tá roinnt píosaí ceoil cumtha aici roimhe seo, ach ní raibh sí ariamh páirteach i gcoimisiún den chineál seo. Tá cáil ar mhúinteoir eile de chuid an Ghaelacadaimh, Johnny Óg Connolly, mar bhoscadóir agus mar chumadóir. D'eisigh sé dlúthdhiosca i 2011, Aisling Yoshua, ar a bhfuil 5 píosa ceoil a chum sé féin. Fuair sé an chéad áit i gcomórtas Best Trad Album sna Irish Times Ticket Awards 2011.
Nuair a rinne An Gaelacadamh cinneadh sraith cheoil a choimisiúnú, shocraíomar go gcomhoibreodh muid le cumadóirí áitiúla ó tharla go dtuigeann siad ár n-aidhmeanna agus go bhfuil ceol de chaighdeán an-ard cumtha acu roimhe seo. Scríobh an bheirt cumadóir seo píosa ceoil amháin le chéile cheana, rud a thaispeáineann go bhfuileadar go maith in ann comhoibriú le chéile ar bhealach cruthaitheach. Ní raibh deis acu roimhe seo píosa ceoil cuimsitheach ar nós an sraith a bheadh i gceist againn anseo a chumadh. Is dul chun cinn nádúrtha an coimisiúiniú seo ar an an obair atá déanta ag an nGaelacadamh thar na mbliana leis an gceol traidisiúnta a fhorbairt agus le cabhrú le dul chun cinn proifisiúnta ceoltóirí an cheantair.
Éigse 2013
Éigse an Spidéil 2013: ar siúl ó 6ú Márta go 10 Márta.
Ar an 9ú a bhí an coirmcheol mór agus Sruth.
Tá clár Éigse na bliana ar fáil le léamh ar an láithreán seo. I measc na himeachtaí bhí ealaíon, ceolchoirm, seoladh CD, Árdán, ceardlanna, seisiúin, siúlóid agus go leor eile.
Damhsoir Traidisiúnta na hIndia ag Éigse an Spidéil 2008.
Ceathrar
Taispeántas ealaíona Éigse an Spidéil 2013.
Martha Williamson
Rugadh agus tógadh Martha i mBaile 'n tSagairt, i gCeantar an Spidéil. I 2006 bhain sí céim amach ón Institiúid Teicneolaíochta i Sligeach in Ailtireacht Inmhéanach.Sa mbliain 2010 ghlac sí le post mar photadóir faoi oiliúint le Rob d'Eath sa gCeardlann sa Spidéal agus thosaigh sí ag obair le cré agus bhí sí gafa leis an ábhar as sin amach. Tar éis bliain a chaitheamh le Rob, d'éirigh léi áit a fháil ar chúrsa oiliúna do photadóirí agus do chriadóirí le Bord Ceardaíochta na hÉireann i gCill Chainnigh. Chaith sí dhá bhliain ansin agus tá sí ar ais arís sa gCeardlann ag obair le Rob. Oibríonn Martha le poirceallán den chuid is mó, sin cré bán fineáilte. Déanann sí maisiúchán láimhe ar na míreanna; patrún séabra is iondúla a bhíonn aici agus feictear cosa beaga ar obair Mhartha go minic. Críochnaíonn sí na píosaí le glónra gléineach.
Ruth Cadden
Is ealaíontóir as Bothúna sa Spidéal í Ruth, atá lonnaithe anois i gCathair na Mart i gContae Mhaigh Eo. Bhain sí céim onóracha amach sna Mínealaíona i gColáiste Ealaíne agus Deartha Crawford i gCorcaigh. Is iomaí sin gné den ealaín a mbíonn Ruth ag plé leis: dealbhóireacht, líníocht, péinteáil agus eitseáil san áireamh. Bíonn tírdhreacha, saothair fhíoracha idir ainmhithe agus daonna, portráidí agus a leagan féin de scéalta as miotaseolaíocht na Gréige chomh maith le tráchtaireacht shóisialta mar ábhair aici.
Is féidir tuilleadh eolais a fháil ach láithreán Ruth féin a dhearcadh.
Ciara Ní Chualáin
Is as Inis Oírr í Ciara. Bhí suim i gconaí aici i gceirdeanna tradisiúnta agus í ag éirí aníos. Chaith sí dhá bhliain i gCill Chainnaigh ag ag cur faobhair ar a cuid scileanna potaireachta idir 2010 agus 2012. Tá sí ag críochnú céim onóracha i nDearadh Ceirmeacha sa gColáiste Ealaíne agus Deartha i Luimneach faoi láthair. Tá súil aici a stiúideó féin a oscailt ach a gcríochnóidh sí an cúrsa.
Ráiteas Ealaíne Chiara
Is é an tírdhreach Inis Oírr atá mar ábhar inspioráide agam. Bíonn na patrúin éagsúla sa ngaineamh a fágtar de bharr na farraige ar m'intinn agam agus mé ag cruthú mo shaothair. Bím i gcónaí ag iarraidh na cuair orgánacha atá ar fáil timpeall an chósta a léiriú i ngach píosa oibre.
Kevin O'Kelly
I nGaillimh a rugadh Kevin agus is de shliocht ealaíontóirí agus ceardaithe é. Eagraíonn a athair ranganna potadóireachta. D'fhreastail Kevin ar na ranganna seo, mhúin sé cuid díobh níos faide anonn agus ba mhór an sásamh dó cruthaitheacht na bpáistí a fheiceáil ag bláthú. Rinne sé forbairt ar a chuid oibre féin agus lean lena dhúil mór i gcúrsaí ceoil agus drumadóireachta. Faoi láthair, bhásaí agus plátaí balla atá á ndéanamh aige agus baineann sé leas as na bunfhoirmeacha seo mar dhromchla do mhaisiúcháin ghrafacha. Faoi anáil shaothar Peder Rassmussen agus Grayson Perry, is mian leis go ngabhfadh an té atá ag breathnú ar an bpíosa i ngleic leis an bpíosa agus go mbainfeadh sé taitneamh as an smaoineamh a ghabhann leis.
Quick links:
